Bláberjadraumur
Það þarf ekki að vera flókið að búa sér til saðsaman og ljúffengan heilsudrykk!
Hér er uppskrift af afar einföldum, meinhollum og bragðgóðum bláberjadraumi sem tilvalið er að fá sér eftir æfingu, sem millimál yfir daginn eða jafnvel sem léttan hádegisverð!
Bláberjadraumur fyrir einn:
1 bolli frosin þroskuð bláber (tilvalið að fara í berjamó og frysta)
1 lítill banani
1-2 msk chia fræ
1 skammtur ósykrað súkkulaði prótein
½ bolli ósæt plöntumjólk, t.d. haframjólk
Settu allt saman í blandara eða matvinnsluvél og þeyttu saman. Forðastu að þeyta lengi svo drykkurinn fari ekki að freyða.
Heilsusamlegir eiginleikar bláberja: villt bláber og lífrænt ræktuð eru einstaklega nærandi.
Bláber eru auðug af vítamínum, steinefnum og trefjum og auk þess einstaklega rík af andoxunarefnum en innihalda afar fáar hitaeiningar!