Til baka

Er glútein óhollt?

Töluvert er um að fólk sé að forðast glúten án þess að þjást af glútenóþoli (selíak). Margir heilsugúrúar tengja mikið af kvillum við glútenóþol og benda á fólk sem fengið hefur bót meina sinna eftir að glútenið var tekið úr fæðunni. Mikilvægt er þó að velta fyrir sér hvort að almennt bætt mataræði getur legið að baki bættri líðan (t.d. meira af grænmeti og ávöxtum) frekar en það að taka alveg út glúten. Nokkuð margir borða mikið af ljósu brauði og hefðu gott af því að skipta því út fyrir eitthvað annað, ekki út frá magni glúteins heldur t.d. aukins magns trefja.

Selíak er krónískur sjúkdómur þar sem þarmarnir verða fyrir skaða vegna glútens. Að vera með ógreindan selíak sjúkdóm getur verið mjög alvarlegt og einkenni geta m.a. verið næringarskortur og þunglyndi. Eina meðferðin er ævilangt glútenlaust fæði (ekkert hveiti, rúgur eða bygg).