“Snickers” bitar
Hollir og góðir "Snickers bitar" til spari, stútfullir af heilnæmri næringu.
Þar að auki er afar auðvelt að útbúa þá og fullkomið að gera með og fyrir börnin.
Innihald:
10 stk. vænar ferskar döðlur (ekki þessar steinlausu í pokunum, heldur þær sem þú finnur gjarnan innan um grænmetið og ávextina)
2 msk hreint hnetusmjör (mér þykir grófa hnetusmjörið betra)
¼ bolli smátt saxaðar jarðhnetur
½ bolli dökkt súkkulaði
1 tsk kaldpressuð lífræn kókósolía
Aðferðin:
Skerðu í hverja döðlu langsum, opnaðu varlega og fjarlægðu steininn. Fylltu svo döðluna af hnetusmjöri (sirka ½ tsk) og bættu dassi af söxuðum hnetum með. Lokaðu rifunni með fingrunum og leggðu döðluna til hliðar.
Bræddu súkkulaði og kókosolíu saman yfir vatnsbaði. Dýfðu svo döðlunum, hverri á eftir annarri, í súkkulaðið. Hér er gott að nota tannstöngul eða prjón. Leggðu döðlurnar frá þér á disk eða plötu með bökunarpappír (svo súkkulaðið festist ekki við undirlagið) og stráðu sjávarsalti (eða jafnvel lakkríssalti) yfir og settu inn í ísskáp þar sem súkkulaðið harðnar vel.
Verði ykkur að góðu!