Til baka

Út að borða

Með smá undirbúningi getur þú auðveldlega leyft þér að fara út að borða á veitingastað þó þú sért að reyna að léttast. Flestir veitingastaðir bjóða upp á hitaeiningasnauða valmöguleika.

Kynntu þér matseðilinn, ákveddu hversu margar hitaeiningar þú ætlar að leyfa þér að borða og fáðu þér létt nasl áður en þú leggur af stað. Það minnkar líkurnar á því að þú fallir fyrir freistingum eða borðir of mikið.
Gamla góða máltækið er enn í gildi: Allt er best í hófi!

Að fara út að borða þarf heldur ekki bara að snúast um matinn. Njóttu þess einfaldlega að spjalla og vera í góðum félagsskap.

Þegar þú kemur á veitingastaðinn geturðu haft ákveðin atriði í huga sem hjálpa þér að halda í hófið:

• Fáðu þér vatn um leið og þú kemur á staðinn. Það dreifir athyglinni og hjálpar þér að forðast brauðkörfuna.
• Tilvalið er að panta sér salat í forrétt til að fá ráðlagðan dagsskammt af grænmeti og trefjum.
• Veldu hitaeiningasnauðan drykk eins og vatn með sítrónu, sykurlausan drykk eða lítinn skammt af venjulegum drykk.
• Neyttu áfengis í takmörkuðu magni fyrir matinn. Áfengi getur aukið matarlistina og er ríkt af hitaeiningum.
• Fáðu sósuna í séríláti eða til hliðar.
• Athugaðu hvort þú getir fengið minni skammtastærð, t.d. hádegisverðarstærð.
• Haltu þig við einfaldleikann með því að panta grillað eða bakað, magurt kjöt, fisk eða fuglakjöt. Grænmetið er best hrátt, gufusoðið eða soðið - án olíu eða smjörs.
• Fáðu þér grænmeti sem meðlæti í staðinn fyrir franskar kartöflur eða bakaða kartöflu.
• Veldu súpur sem eru lagaðar úr soði eða tómötum í stað þeirra rjómalöguðu.
• Veldu salat án brauðteninga eða beikonbita og farðu varlega í ost og hnetur. Hafðu salatsósuna í sér íláti.
• Borðaðu aðeins helminginn af brauðinu sem fylgir hamborgaranum eða samlokunni. Sum hamborgarabrauð innihalda allt að 400 hitaeiningar.
• Vandaðu valið á sósunni. Veldu sinnep í stað majóness og notaðu salsa í stað þess að nota sýrðan rjóma.
• Notaðu „gaffal aðferðina“ þegar þú borðar salat - þ.e. dýfðu gafflinum í salatsósuna áður en þú stingur honum í salatið.
• Leggðu gaffalinn niður milli bita. Þannig lengir þú þann tíma sem það tekur að borða og gefur líkamanum góðan tíma til að meta hvenær hann verður saddur.
• Borðaðu rólega og spjallaðu á meðan þú borðar. Gefðu heilanum tíma til að meðtaka hvað þú ert að borða. Þegar þú finnur að þú ert orðin/n södd/saddur, leggðu gaffalinn niður og biddu þjóninn að taka diskinn af borðinu.
• Pantaðu ávexti sem eftirrétt eða slepptu eftirréttnum og fáðu þér frekar gott kaffi með fitulausri mjólk.
• Ef sætindaþörfin tekur yfirhöndina, deildu þá eftirrétti með fleirum. Einn eftirréttur og fjórir gafflar ætti að duga.