Útlitið eða innri vellíðan, hvað hvetur þig áfram?
Þegar við spyrjum okkur sjálf spurningarinnar: Af hverju vil ég hreyfa mig? er algengt að fyrstu svörin lúti að útliti okkar og ytri þáttum.
Við viljum léttast, grennast, fá fallegri útlínur og stinnari rass. Eða, við viljum hlaupa 10 km á mettíma, vinna til verðlauna og sýna öðrum hvað í okkur býr. Reynslan hefur hinsvegar sýnt okkur að innri hvatar eru öflugri og halda okkur mun lengur við efnið heldur en þeir ytri. Innri hvatar tengjast gjarnan tilfinningum okkar og gildum, okkar innri manni. Góð innri hvatning getur verið tilfinningin sem þú finnur fyrir eftir að æfingu er lokið, sigur tilfinningin sem fylgir því að bæta árangur sinn og ánægjan með það eitt að hafa staðið við loforðið sem þú gafst þér um að mæta á æfingu.
Í stað þess að hugsa um að þú þurfir að drífa þig á æfingu til þess að brenna fitu og fá stinnari rass, skaltu snúa huganum að innri þáttunum og hugsa til dæmis: Í dag ætla ég að fara út að ganga eða hlaupa með makanum mínum eða góðum vini, njóta samverunnar og þess að anda að mér fersku lofti utandyra. Eða, í dag ætla ég að þjálfa hugarfar mitt í erfiðum æfingum, ég ætla að gera æfingu sem reynir á þolrif mín og beina huganum að jákvæðum hugsunum á meðan. Nú eða, í dag ætla ég að gera auðvelda og skemmtilega æfingu í ræktinni, njóta félagsskaparins og dekra svo við mig á eftir.
Það er sannarlega gott að setja sér markmið og vinna að þeim, en það hefur sýnt sig að þegar athyglin er sett á innri þættina og sjálfa leiðina að markmiðinu, ertu líklegri til að ná markmiðunum heldur en þegar öll athyglin er sett á endastöðina og hvatinn kemur þaðan. Hvort sem það er að létta þig, vinna til verðlauna eða fá stinnari rass,.
Við mælum með því að þú hugsir um það, af hverju þú viljir hreyfa þig. Skrifaðu hjá þér allt sem þér kemur til hugar og vittu til, því lengri og ítarlegri sem listinn þinn verður, því öflugri hvati verður hann fyrir þig.
Mundu svo að þó þú missir dampinn stundum, upplifir niðursveiflu og gleymir innri hvötunum þá er það eðlilegur hluti af heildarferlinu og þýðir ekki að þú eigir að hætta. Þessar sveiflur þekkja allir, líka afreksmenn íþrótta, og lykilatriði er að rifja sem oftast upp innri hvatana og þjálfa þannig hugarfarið til langs tíma!